भालू भैया

चम्पा, सोना, मोना, मुनिया,

डोलू, भोलू अउ राजू।

भालू भैया के सुन कहनी,

सुग्घर बैठ एक बाजू।।

रहे रंग मा करिया भुरुवा

सदा मस्त मंगन भालू।

बड़का बड़का पँजा हाथ के,

रहिथे सबले ये चालू।।

नदिया-नरवा के मछली ला,

भोजन अपन बनाथे।

मधुरस पी रुखराई के फर,

टोर-टोर अब्बड़ खाथे।।

नदिया-नरवा के पानी मा,

मंगन हो खूब नहाथे।

खेल-कूद करके जंगल मा,

जिनगी ला अपन पहाथे।।

बन-बन घूमय फिरय अकेला,

लटक पड़े मा ये सोथे।

दुख पीरा मा भालू भैया,

मनखे जस भारी रोथे।।

-हेमलाल साहू

छंद साधक, सत्र-01

ग्राम-गिधवा, जिला बेमेतरा

Comments

सबले ज्यादा पढ़े गिस

स्कूल पढ़े बर जाहूँ (हेम के सार छंद)

स्कूल पढ़े बर जाहूँ (हेम के सार छंद) स्कूल पढ़े बर जाहूँ मोला, पकड़ा दे तँय बस्ता। कहिथे नोनी हर बाबू ला, बता स्कूल के रस्ता।। भर्ती मोला आज करा दे, स्कूल रोज मँय जाहूँ। सुनले विनती मोरो बाबू, सुघ्गर विद्या पाहूँ।। पढ़ई-लिखई मा मँय हर, सबले अव्वल रइहूँ।। खेल-कूद मा मन चंगा रख, सबले आगू बढ़हूँ।। जोड़-घटाना गुना-भाग कर, गिनती ला मँय गिनहूँ। आखर-आखर ला पढ़-पढ़ के, सीख-सीख मँय लिखहूँ।। अपन स्कूल मा होशियार बन, कसके धाक जमाहूँ। डॉक्टर, मास्टर बन वकील महुँ, जग मा नाम कमाहूँ।। - हेमलाल साहू छंद साधक, सत्र-१ ग्राम-गिधवा, जिला-बेमेतरा

गुड़िया रानी (चौपाई छंद)

गुड़िया रानी (चौपाई छंद) गुड़िया रानी बड़े सियानी। दूध भात खा पीयय पानी।। सबके हावय लाड दुलारी। सबले सुघ्घर राजकुमारी।। दौड़-दौड़ के खेलय रानी। करथे फेर अपन मनमानी।। थप-थप पीटय सुघ्गर थपड़ी। डफ डफ धरै बजावय दफड़ी।। छम-छम सुग्घर पायल बाजय। ढम्मक ढम्मक गुड़िया नाचय।। ला-ला ला-ला कहिके गावय। अम्मा अम्मा कहि चिल्लावय।। -हेमलाल साहू छंद साधक, सत्र -1 ग्राम - गिधवा, जिला बेमेतरा

टुकटुक

Search This Blog