आवाज के दुनिया (चौपाई छंद)
झर-झर, झर-झर बहिथे झरना।
खन-खन खनके चूड़ी कँगना।।
सरर-सरर चलथे पुरवइया।
अँभा-अँभा बोलत हे गइया।।
मैं-मैं करथे छेरी-पठरू।
बाजे डम-डम शिव के डमरू।।
फड़-फड़ फड़थे कागज पुड़िया।
खिल-खिल हाँसय नान्ही गुड़िया।।
देख कुकर भौंकय भौं-भौं।
मोटर हारन बाजय पौं-पौं।।
म्याऊ-म्याऊ बोलय बिलई।
चूँ-चूँ चहकय नान्ही चिरई।।
टन-टन बजय स्कूल के घंटी।
भागय सरपट-सरपट बंटी।।
बादर गाजय घड़घड़-घड़घड़।
चमके बिजुरी कड़कड़-कड़कड़।।
रचनाकार : हेमलाल साहू
ग्राम : गिधवा, जिला : बेमेतरा (छत्तीसगढ़)
No comments:
Post a Comment